 |
juan carlos perez Ametsak zetarrak bezalakoak
dira, tximeleta bihurtzeko zai, hegan egin eta bizitza labur,
bat, edo gehiago (batek daki), bizi ahal izan, episodioren batetan
protagonista izateko asmoz edo, Jainko berriak sortu eta akabatuz,
ke hutsa bilakatuko den musu sakratua noiz iritsiko ote zaien
irrikitan.
Ametsak, gure buru gainetik hegaka dabiltzan txori gosetiak bezalakoak
dira, beti hor, zelati. Ameslariaren antzerakoak dira ametsak,
laberintoaren barruan harrapaturik amodio ezinezkoaren bila etengabe;
egia maitatatzen duten gezurtiak dira ametsak, noria baten modura
amaierarik gabe bueltak ematen; zeruari dantza erotua eskeintzen
dioten bitartean mundu berri baten gureganatzeko errezatzen, enbataren
ondoren geratuko den lasaitasunaren alde otoitz egiten.
IKARO-k gu denon antza du, hain goitiar, hain hauskor, huts eta
ameslari,...; argi zein beroaz hain behartsu, zeren Eguzkirantz
jotzen bait du itsu-itsuan, lumaz eta argizariaz eginiko hegalak
urtu egingo zaizkiola ohartu gabe, bere gabezietako uretan itoko
dela sumatu gabe ere.
|
| Juan Carlos Perez (Mutriku-1958), gure
herriko gaur egungo musika herrikoiaren erreferentzirik garrantzitsuenetakoa
dugu. Betidanik musika zein literatura izan ditu bere gogoaren ardatz.
1975. urtean Zuzenbidearen ikasketan hasi zituen Deustuko Unibertsitatean
eta, era berean, ITOIZ pop-rock talde mitikoaren antolatzaile eta
aintzindaria izan zen. Talde honetan kantu eder mordoa sortu eta
7 disko bikainetan errejistratu zituen (azkena 1988. urtean grabatu
eta argitaratua). Garai honetan ere, beste zenbait talderentzat
produkzio artistikoak burutu zituen (Jotakie, Tahúres Zurdos
eta Piztiak. Geroago Maixa Ta Ixiar taldearen "Uhinez Uhin"
diskoaren produkzio artistikoa ere). 1983 eta 1984 urteen bitartean,
bibolina ikasi zuen bi urtez eta, era berean, Bilboko Kontserbatorioan,
solfeo, armonia eta pianoa ikasten hasi zen. 1984.ean, Itoiz-ekin
batera, Telesailetako banda sonoroetan lan egiten hasi zen (La Aventura
Humana, Los Tres Anillos,...). 1989.ean, Musika Elektroakustikako
Konposizio Kurtso bat ere burutu zuen Cuenca-ko Kontserbatorioan,
Gabriel Brnzic maisuaren zuzendaritzapean. Harrez gero, beste lan
ugari burutu ditu antzerki, dantza, zinerako,.....Ordutik hona,
musikaren lengoaiaren ikerketa eta ikasketara dedikatu da buru-belarri,
makinen hizkuntza eta akustikaren mundu intuitiboago konbinatuz.
IKARO ideia horren garapena, musikak, hitzak, moldaketak,.. JC
Perez-en esku egon da, zeregin honetan azken urte osoa eman duelarik.
Aurreko guztiaren emaitza da honako diskoa: hamar kantu berri,
diztiratsu, zuzen bezain ausartak, biluztu eta xehetasunetan joriak.
Denbora guzti honetan JC Perez-ek, Fran Iturbe izan du alboan,
diskoaren produktore ezezik, euskarri artistiko eta morala ere
eskeini dizkiolarik: album honetako musiketatik 3, F. Iturbek
berak konposatuak dira. JC Perez-ek etapa berri bati ekin dio
une honetan eta disko honetako kantuez gain, aurreko "Atlantic
River" eta "Hau Berua" lanetako errepertorioak
harturik, eskenatokietatik zehar ibilbide berri, arin eta eraberritu
bat zabaltzen da Mutrikuko kantariarentzat.
Juan Carlos Perez, berak sorturiko IKARO-ren modukoa da, indartsu
bezain harrigarria: ametsak eta mundu bereziak behin eta berriro
eraiki eta deseuztatzen dituenetakoa, mugarik gabeko desertu zabalean
arrastoa etengabe galdu eta aurkituz, irabazlerik ez duen laberintoaren
joku krudelaren sareetan harrapaturik betirako, baina halere libre
eta bakan.
IKARO, bere sortzailea JC Perez-en neurrira egina dago, intuizioak
gidaturik suhar, zalantzaz betea, detaileetan aberats baina izaeran
zotil eta soila, Jainko beraren ispilua diren alboko gizakien
irudimena zein bihotzaren laztangarri.
"Bitacora Cahiera" (Esan Ozenki Records-1992 / Elkarlanean
1996)
"Atlantic River" (Elkarlanean-1994)
"Hau Berua" (Elkarlanean-1996)
"QUATUOR-Arkadius String Quartet"- (NOCD Records-1997)
"Ikaro" (Elkarlanean-2000)
|
